Rom 9 | LEU | STEP | Nenia, ne waan xuvul pa Krais e voxo ne ferawai tuuna, ne pife bit. A Vovau Xaradak taxa paamuian a nasaman siak e voxo a nasaman siak a turoxo o a ferawaian siak a tuuna.

aTpt 21:12

bTpt 18:10,14

cTpt 21:12

dMlk 1:2,3

eTln 33:19

fTln 9:16

hOsa 2:23

iOsa 1:10

jAis 10:22,23

kAis 1:9

lAis 8:14; 28:16

Romans 9

A Piran Xuvul Pana Mu Rabuna Aava Nane Siak Fati Nari

1 Nenia, ne waan xuvul pa Krais e voxo ne ferawai tuuna, ne pife bit. A Vovau Xaradak taxa paamuian a nasaman siak e voxo a nasaman siak a turoxo o a ferawaian siak a tuuna. 2 Ne taxa mamaxus faagut e a xunus iga a tavanat senaso a maana tauga ri fo taaluugan na Krais. 3 Saxano yaan rao ne fenung xe sina Piran o i taa fatutulau talo nenia, ne taa pife faadoxotanan xuvul pa Krais tamo i taa xavang a mu tiak, nari aava ri mu tauga, xena namkai. 4 A mu Israel va mu rabuna aava Piran a siak fati nari xana xa e tavai nari pana maana roxoyan xaves malaan: nane xel patak nari xe sina xa e xavei nari e a faxalit nari pana waanan sina lana miridingan aava falet xuvul pari. Nane faxuvul nari xuvul pana xa sena maana turoxoian sina. Nane turoxoian lisan a vuputkai sina xe siri e fapiti nari pana vilaana fatak ina lotu e tavai nari pana maana kuus fanaian xaves. 5 A mu buri ve mu matalava sitaara e a Mataa Failai sina Piran a waan lana saxa pabung siri. E nane ve a Piran Tuuna e i taxa lo paamuian a maana mo xapiak. A mu rabuna xapiak ri taa nanguse e kuus fati a isina naboxo e xe vulai. A Tuuna.

6 Taasaxa, mu kuus fanaian aave sina Piran ri pife poxo layaan a mu rabuna sina ri gigirane. Senaso a Piran pife siak fati a mu Israel xapiak. 7 E layaan ne ferawai pana mu bu Abrahem ne pife ferawai pana mu buna xapiak xe mui, piau. Ne taxa ferawai pari aava Piran xo a xali nari pana mu rafulak si Abrahem. Senaso a Piran a xuus na Abrahem,

“Ne taa kat a mu bu Aisaak mon pana mu rafulak siim.” ^a
8 Senaso nari aava ri luxan lapaana vubuxanan sina mataa mon a Piran pife xali nari pana mu bu Abrahem, piau. Taasaxa, nari aava ri luxan lapaana kuus fanaian sina Piran, nari ve ri mu bu Abrahem. 9 Senaso a kuus fanian sina Piran xe si Abrahem a malaan:

“Lana yaan fatak ne taa ulaamaan e na Sera xa i taa luk a lak tomexaan.” ^b
10 E lamon pana so ta mo a savat mui: na Rebeka tivaian a lua lapaa Aisaak aava butaara. 11 Taasaxa paamuina luxaana lua aave layaan nare, re pife vil a mo roxo o saat lunai, a Piran xo fo lamon faati o i taa fakalimaan a saxa lak xena waan la pabung sina e pife nare xapiak. 12 A pife siak fati a lak aave sena faisok sina, piau. A siak fatie sena vubuxanan sina xa. Taara texaas o a Piran a vil malaane senaso a ferawai malaan xe si Rebeka, paamuina luxaana lua:

“A lak tuaan siim i taa sisiak xe sina lak ti mui.” ^c
13 E lokavai mupiis a mataa ina kuus fatuxai a kala lana Xakalayan Taap malaan:

“Na Yaakop aava lak mui, ne vubuxan xasingite taasaxa ne gigiran na Iso aava lak tuaan.” ^d
14 Lavaxa, naak taara taa kuus o a Piran i taxa fapala senaso a siak fati a saxa lak mon, bo? Piau, e piau paaliu. 15 Taara texaas o pife tuuna senaso a Piran a xuus na Moses:

“Ne taa muluk nase' ta mataa ne vubuxane e ne taa fangasik nari aava ne buk fangasik nari.” ^e
16 A malaanabe': layaan a Piran a siak fati a saxa, nane pife vile sena vubuxanan o faisok sina mataa aave, piau, nane vile sena mamaaluxan sina xa. 17 E taara texaas o a Piran a siak fati a saxano rabuna xena kawaasanaan nari senaso lana Xakalayan Taap a xuus na Fero aava paamua lava ti Isip, malaan:

“Ne fakalimaan nano pana vepen siim xena fasavat a vubuxanan siak. Ne taa faxalit a mu rabuna pana gutan siak e voxo ne taa fakasanam nano layaan no gigiranau. E a mu rabuna xapiak la xavala ri taa texaas sega.” ^f
18 E voxo, mi taa masam se Fero malaanabe': layaan a Piran a vubuk rao i taa muluk a xol palau, i taa vile. E layaan a vubuk rao i taa favaang bit a mataa, i taa vile. 19 Lavaxa, a saxa simi i taa xuusau, “Xenaso a Piran a tusui netaara, senaso nase' fexaxaas sena tisui a lamonan sina Piran?” 20 Taasaxa ne taa suie malaan: nami, mi mataa mon e mi lamon o mi taa ferawai sarak xe sina Piran, bo? Ne taa ferawai paap famodak. Tamo mi fi a bi mi lamon o a bi taa fin nami pana “Xenaso mi fo fiyau malaanabe'?” ^{▼▼O: Tamo mi vesan a paxiis pana xavala mi lamon o a paxiis i taa fin nami pana “Xenaso no fo vesanau malaanabe'?”} 21 Piau, i taa pife ferawai malaan. Taasaxa, a mataa aava fi a bi a fexaxaas sena lamon faati pana so ta buk bi i taa fiye, bo? A fexaxaas sena fi a maana buk bi pana paxana ni: a saxa xakavena fun aava vipirigaan marasaxa e a xungusaxu aava bi palau.

22 Lavaxa, naak a Piran a vubuk rao i taa faxalit a maraleian sina e fasavat a gutan sina la matavas taasaxa nane waan fananap e pife fakasanam fatapusan nari aava xena kawaasanaan nari, bo? 23 Naak nane vil malaane xena famatavas a maana roxoyan molava sina xe siri aava ri taa siak a mamaaluxan sina, nari aava nane fakalimaan paamuin nari xena nai la vepen roxo marasaxa xuvul pana. 24 E netaara, saxano Juda e saxanofuna aava ri pife Juda, taara mu rabuna aava Piran a muluk netaara. 25 Lana mu xakalayan si Osea aava mataa ina kuus fatuxai, a Piran a kuus:

“Ne taa xali a rabuna aava ri pife rabuna siak pana ‘Rabuna siak’ e ne taa xali nari aava ne pife vubuxan nari pana ‘rabuna aava ne vubuxan xasingit nari.” ^h
26 E vaxa na Osea a kala pana mu rabuna aava ri pife Juda malaan:

“Pe lana bina aava paamua, a Piran a xuus nari, ‘Mi pife rabuna siak’, lana bina aave a Piran taa xali nari pana ‘mu rafulak sina Piran aava To Vulai.” ⁱ
27 Taasaxa, na Aisaia a xukulai faagut sena mu rabuna ti Israel malaan:

“Naapalaan a mu rafulak ti Israel ri tafe xaves, malaan sena gun pe la taas, a Piran i taa fakaxup a nufuna modak iri mon. 28 Senaso a Piran taa fasavat a fakasanaman sina lapi la xavala. E i taa fataxapin fatapusane.” ^j
29 E na Aisaia a kuus fulaa malaan:

“Tamo Piran pana Gutan Xapiak a pife ta'ulan a saxanu butaara, taara tafo malit malaan sena rabuna pe la ro bina Sodom e Gomora aava ri maat layaan a Piran a kawaasan xapine.” ^k

A Mu Israel Ri Pife Namkai

30 Lavaxa, taara taa kuus panaso? Taara taa kuus o a mu rabuna aava ri pife Juda, ri pife seng a salan xena tigina fatak la matana Piran taasaxa ri tingine layaan a Piran a fatiginei fatak nari senaso ri namkai se Krais. 31 Taasaxa mu Israel aava ri fuuna faisok faagut pana usiaana vuputkai sina Piran talo ri taa faxaalit o nari, ri rabuna roxo, ri seseng e ri seng maat. 32 Xenaso a mu Juda ri seng maat? Ri pife tingine senaso ri lamon o nase' ta mataa a usi xapin a vuputkai a fexaxaas sena tigina fatak la matana Piran e ri pife namkai e voxo ri sopitai sena ‘faat ina sopitaian’. 33 Na Aisaia a kuus fatuxai pana maana mo aanabe'. Nane kuus malaan:

“Kaalum, nenia, a Piran, ne fanei a faat xena sopitaian lana bina siak, na Saion, e saxanofuna ri taa poxo xuluna taasaxa nase' ta mataa a namkai sena i taa pife famangilan.” ^l